Երևան, 29.11.2020
naxagah

ՀԱՐԳԵԼԻ ԲԱՐԵԿԱՄ

Ողջունում եմ Ձեզ Հայաստանի արհմիությունների կոնֆեդերացիայի ինտերնետային կայքում:

Էլեկտրոնային հաղորդակցության այս միջոցը հրաշալի հնարավորություն է արհմիությունների գործառույթներին, իրականացվող ծրագրերին և միջոցառումներին տեղեկանալու և հետադարձ կապի միջոցով մասնակցային գործընթաց ապահովելու համար: Մեր կայքում Դուք կգտնեք անհրաժեշտ տեղեկություններ աշխատողի շահերի պաշտպանությանն առնչվող օրենսդրական, իրավական ակտերի ու նախագծերի մասին: Էլեկտրոնային ընդունարանը հնարավորություն կտա Ձեզ հետաքրքրող հարցերի վերաբերյալ ուղարկել դիմումներ և ստանալ պատասխաններ: Հուսով եմ, որ մեր կայքն իր մատչելիությամբ և ժամանակակից գործիքներով կդառնա տեղեկատվական լավագույն աղբյուր բոլոր օգտագործողների համար:

Հայաստանի արհմիությունների կոնֆեդերացիայի նախագահ՝ Է. Թումասյան

Կայքի հին տարբերակը

25 Նոյեմբեր, 2020

ԿՈՎԻԴ 19-ի կանխարգելման միջոցառումների արդյունավետության գնահատման նպատակով «ՀՀ-ում կովիդ-19-ի բացասական հետևանքներից աշխատողների անվտանգության և առողջության պաշտպանության նպատակով հանրային իրազեկման արշավ» ծրագրի շրջանակներում Հայաստանի արհմիությունների կոնֆեդերացիան Աշխատանքի միջազգային կազմակերպության Մոսկվայի գրասենյակի ֆինանսական աջակցությամբ աշխատավայրում աշխատողների առողջության և անվտանգության պաշտպանության միջոցների ապահովման կապակցությամբ իրականացրել է աշխատանքի ոլորտում վարչարարության վերաբերյալ վերլուծություն:


Ստորև ներկայացված է վերլուծությունն ամբողջությամբ: Կարդալ այստեղ:

23 Նոյեմբեր, 2020

Ցավակցական ուղերձ

 

2020  թվականի նոյեմբերի 22-ին ծանր հիվանդությունից մահացել է ՀԱՄԿ-ի անդամ  Տրանսպորտի և հաղորդակցության  աշխատողների արհեստակցական կազմակերպությունների ճյուղային  հանրապետական  միության  նախագահ Գագիկ Նիկոլայի Սահակյանը:

1986 թվականից Գագիկ Սահակյանը ղեկավարել է Տրանսպորտի և հաղորդակցության  աշխատողների արհեստակցական կազմակերպությունների ճյուղային  հանրապետական  միությունը, նպաստել ոլորտի արհմիության անդամների սոցիալ-տնտեսական  խնդիրների լուծմանը: 

Հայաստանի արհմիությունների կոնֆեդերացիան իր խորին ցավակցությունն ու զորակցությունն է հայտնում Գագիկ Սահակյանի ընտանիքին, հարազատներին և ընկերներին, կիսում կորստի վիշտը:

 

 

Հայաստանի արհմիությունների

կոնֆեդերացիայի նախագահ`                               ԷԴՈՒԱՐԴ ԹՈՒՄԱՍՅԱՆ

30 Հոկտեմբեր, 2020

Հայաստանի ճյուղային արհմիությունների ուղերձը

միջազգային արհմիութենական հանրությանը

 

Հարգելի՛ գործընկերներ:

2020թ սեպտեմբերի 27-ին Ադրբեջանը Թուրքիայի և միջազգային ահաբեկչական խմբավորումների վարձկանների մասնակցությամբ լայնամասշտաբ պատերազմ սկսեց Արցախի Հանրապետության (Լեռնային Ղարաբաղի Հանրապետության) դեմ:

Այս հակամարտությունն ունի երկար պատմություն:

Դեռևս 1918թ. Լեռնային Ղարաբաղի բնակչությունը, որի 95%-ը հայեր էին, հռչակեց իր անկախությունը, հրաժարվեց մտնել առաջին Ադրբեջանի Հանրապետության կազմի մեջ և դիմակայեց թուրք-ադրբեջանական ջարդերին: 1921թ. հուլիսի 4-ին Հարավային Կովկասում Սովետական Հանրապետությունների ձևավորման ժամանակ, Լեռնային Ղարաբաղը Հայաստանի և Ադրբեջանի կառավարությունների միջև ձեռք բերված պայմանավորվածության համաձայն դարձավ Հայկական ՍՍՀ մասը, սակայն հաջորդ իսկ օրը Ստալինի անմիջական միջամտությամբ Լեռնային Ղարաբաղը հարկադրաբար փոխանցվեց Ադրբեջանական ՍՍՀ-ին՝ ստանալով ինքնավար մարզի կարգավիճակ (ԼՂԻՄ):

Անգամ Խորհրդային Միության ժամանակաշրջանում Ադրբեջանական ՍՍՀ իշխանությունները հետևողականորեն խտրականություն էին դրսևորում Լեռնային Ղարաբաղի ինքնավար մարզի հայկական ազգաբնակչության նկատմամբ:

1988թ-ին օգտվելով ինքնորոշման իրավունքից, ԼՂԻՄ ժողովրդական դեպուտատների Մարզային Խորհուրդը ԽՍՀՄ և Ադրբեջանի ղեկավարություններին միջնորդություն հղեց Ղարաբաղը Հայաստանին փոխանցելու վերաբերյալ: Ի պատասխան Ադրբեջանի իշխանությունները կազմակերպեցին Սումգայիթ և Բաքու քաղաքներում ապրող հայերի զանգվածային ջարդեր և կոտորած:

1991թ. անցկացված հանրաքվեի արդյունքում Լեռնային ղարաբաղի ժողովուրդը հաստատեց Ադրբեջանի կազմից դուրս գալու իր ցանկությունը: Ի պատասխան դրան Ղարաբաղում սկսվեց պատերազմ, որը տևեց գրեթե 4 տարի և ավարտվեց 1994թ. մայիսի 12-ին՝ Ադրբեջանի, Լեռնային Ղարաբաղի Հանրապետության և Հայաստանի միջև կրակի դադարեցման վերաբերյալ եռակողմ  համաձայնագրի կնքմամբ:

Չճանաչված Արցախի Հանրապետությունն ունի գրեթե 30-ամյա  գոյության պատմություն: Դա երկիր է իր սահմանադրությամբ, կառավարությամբ, ժողովրդավարական հանրապետության բոլոր տարրերով, քաղաքացիական հասարակության, այդ թվում և արհմիութենական զարգացած կառուցվածքներով: Այս տարիների ընթացքում թեև Արցախի արհմիությունները մեկուսացված են եղել միջազգային արհմիութենական շարժումից, այնուհանդերձ սոցիալական գործընկերության և աշխատանքային իրավունքների պաշտպանության հարցերում  էական արդյունքներ են  գրանցել:

Ադրբեջանական կողմը տարիներ շարունակ կտրականապես  մերժել է փոխզիջումները՝  պահանջելով վերադարձնել Լեռնային Ղարաբաղն իր վերահսկողության ներքո, մերժելով Ղարաբաղի հայերի ինքնորոշման հիմնարար իրավունքը: Այդպիսի մոտեցումն առ ոչինչ դարձրեց միջազգային միջնորդների բոլոր ջանքերը:

Սա արդեն երրորդ պատերազմն է, որն Ադրբեջանը սանձազերծում է ժողովրդավարական զարգացման ուղի ընտրած անկախ Արցախի նկատմամբ:

Խախտելով միջազգային իրավունքը, Ադրբեջանի զինված ուժերը կիրառելով սպառազինության արգելված ձևեր, նպատակաուղղված հարձակում են գործում քաղաքացիական օբյեկտների՝ դպրոցների, հիվանդանոցների, մանկապարտեզների, մշակույթի հուշարձանների և հաստատությունների, եկեղեցիների ու տաճարների վրա, զոհվում են ծերեր, կանայք ու երեխաներ: Ավելի քան 90 հազար մարդ դարձել է  փախստական, 24 հազար երեխա զրկվել կրթություն ստանալու իրավունքից: Մենք դարձել ենք պատերազմական հանցագործությունների ականատես, երբ խաղաղ բնակիչները պարզապես գնդակահարվում են, հարձակվողների թիրախից զուրկ չեն մնում նաև բժիշկներն ու լրագրողները:

Այսօր ոչ միայն Արցախն ու Հայաստանը, այլև ողջ տարածաշրջանը կանգնած են  հումանիտար աղետի առջև:

Թուրքիան 100 տարի առաջ անպատժելիորեն իրականացնելով հայերի ցեղասպանությունն իրենց իսկ պատմական հայրենիքում, հայտարարում է հայ ժողովրդին բնաջնջելու իր մտադրության մասին:

Հայ հասարակությունն ինչպես երբեք համախմբվել է ագրեսորի դեմ պայքարում:

Հայաստանի արհմիությունները նույնպես անմասն չեն մնացել այս դժվարին պահին՝ ուղղելով իրենց ուժերն ու միջոցները Արցախի անօթևան բնակիչներին, արհմիություններին անդամակցող վիրավորների և զոհվածների ընտանիքներին օգնություն ցուցաբերելու հարցում:

Այս օրերին միջազգային շատ կազմակերպություններ, պետության ղեկավարներ, ինչպես նաև միջազգային արհմիություններ, պահպանելով չեզոքություն, դիմում են հակամարտող կողմերին՝ կոչ անելով դադարեցնել ռազմական գործողություններն ու անցնել հակամարտության խաղաղ կարգավորման: Բայց այս պատերազմում կողմերը հավասար չեն. պաշտպանվող կողմը չի կարող դադարեցնել ինքնապաշտպանությունը, քանի դեռ հակառակորդն ի դեմս Ադրբեջանի, Թուրքիայի և վարձկան ահաբեկիչների շարունակում է հարձակումը:

Այն ամենն, ինչ կատարվում է Արցախում, ևս մեկ անգամ ապացուցում է, որ Արցախի բնակիչների անվտանգության միակ երկարատև երաշխիքը Արցախի Հանրապետության անկախության ճանաչումն է: Ադրբեջանի կազմում վերջինիս շնորհված ցանկացած կարգավիճակի պարագայում Արցախի ժողովրդի կյանքն ու անվտանգությունը լինելու են սպառնալիքի տակ, պատմությունը  բազմիցս  ապացուցել է դա:

Դիմում ենք բոլոր արհմիություններին: Մեր առաքելությունն է՝ միշտ պաշտպանել մարդու իրավունքները, պայքարել հանուն արդարության: Խնդրում ենք, մի՛ լռեք, դիմե՛ք ձեր կառավարություններին: Ժողովրդի ինքնորոշման իրավունքը պետք է ճանաչվի միջազգային հանրության կողմից՝ հանուն այնտեղ ապրող մարդկանց փրկության: 

 

Հայաստանի առողջապահության աշխատողների արհեստակցական կազմակերպությունների ՃՀՄ

Հայաստանի մշակույթի աշխատողների արհեստակցական կազմակերպությունների ՃՀՄ

Հայաստանի պետական հիմնարկների, ՏԻՄ-երի և հանրային ծառայությունների աշխատողների արհեստակցական կազմակերպությունների ՃՀՄ

Հայաստանի լեռնագործների, մետալուրգների և ոսկերիչների արհեստակցական կազմակերպությունների ՃՀՄ

Հայաստանի կոմունալ-բնակարանային տնտեսության և ծառայությունների ոլորտի աշխատողների արհեստակցական կազմակերպությունների ՃՀՄ

Հայաստանի կրթության և գիտության աշխատողների արհեստակցական կազմակերպությունների ՃՀՄ

Հայաստանի բանկերի և ֆինանսավարկային կազմակերպությունների աշխատողների արհեստակցական կազմակերպությունների ՃՀՄ

Հայաստանի արդյունաբերության աշխատողների արհեստակցական կազմակերպությունների ՃՀՄ

Հայաստանի ագրոարդյունաբերական համակարգի աշխատողների արհեստակցական կազմակերպությունների ՃՀՄ

Հայաստանի առևտրի և հասարակական սննդի, սպառկոոպերացիայի և ձեռներեցության աշխատողների արհեստակցական կազմակերպությունների ՃՀՄ

«Էլեկտրաարհմիություն» արհեստակցական կազմակերպությունների ՃՀՄ

Հայաստանի թեթև արդյունաբերության աշխատողների արհեստակցական կազմակերպությունների ՃՀՄ

Տեղեկատվական տեխնոլոգիաների, ավիացիայի և հեռահաղորդակցության աշխատողների «Միաբանություն» արհեստակցական կազմակերպությունների ՃՀՄ

19 Հոկտեմբեր, 2020

ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆՈՒՄ ՌԱԶՄԱԿԱՆ ԴՐՈՒԹՅԱՆ ՊԱՅՄԱՆՆԵՐՈՒՄ ԱՇԽԱՏԱՆՔԱՅԻՆ ՀԱՐԱԲԵՐՈՒԹՅՈՒՆՆԵՐԻ ԿԱՐԳԱՎՈՐՈՒՄ

Հայաստանի Հանրապետությունում ռազմական դրության պայմաններում աշխատանքային հարաբերությունների կարգավորման համար ՀՀ Ազգային ժողովը  2020 թվականի հոկտեմբերի 9-ին ընդունել է «ՀՀ աշխատանքային օրենսգրքում լրացումներ և փոփոխություններ կատարելու մասին»  ՀՀ օրենքը (այսուհետ՝ Օրենք), որն ուժի մեջ է մտել 2020 թվականի հոկտեմբերի...

16 Հոկտեմբեր, 2020

ԱՐՀՄԻՈՒԹՅՈՒՆՆԵՐԻ ՄԻՋԱԶԳԱՅԻՆ ԿՈՆՖԵԴԵՐԱՑԻԱ

ԱՐՀՄԻՈՒԹՅՈՒՆՆԵՐԻ ԵՎՐՈՊԱԿԱՆ ԿՈՆՖԵԴԵՐԱՑԻԱ

 

Հայաստանի Արհմիությունների Կոնֆեդերացիայի նախագահ

պարոն Է.Թումասյանին

 

 

 Հարգելի  Էդուարդ,

 

 Խորին անհանգստությամբ և ցավով հետևում ենք Լեռնային Ղարաբաղի շուրջ ռազմական հակամարտության զարգացման ընթացքին: Զոհվում են մարդիկ, ոչնչացվում են ենթակառուցվածքներ և տներ, և հետևանքներն ակնառու են ամբողջ տարածաշրջանում: Խաղաղությունը արհմիութենական շարժման, այն է՝ աշխատողների իրավունքների իրականացման, արժանապատիվ աշխատանք ունենալու և մեր անդամների կյանքի հրամայականն է: Մենք վերահաստատում ենք այս դիրքորոշումը աշխարհի ցանկացած մասում ցանկացած բռնի հակամարտության վերաբերյալ:

 Մենք, անշուշտ, հաշվի ենք առնում այն տեղեկատվությունը, որը Դուք ներկայացրել եք մեզ իրավիճակի վերաբերյալ: Համոզված եղեք, որ մենք դրան վերաբերվում ենք պատշաճ ուշադրությամբ և հաշվի ենք առնում մեր կոչերում և գործողություններում: Դուք տեսել եք Արհմիությունների Միջազգային Կոնֆեդերացիայի հայտարարությունը, որն ամրապնդում է ՄԱԿ-ի Անվտանգության խորհրդի բանաձևը, ինչպես նաև անցյալ շաբաթ ՀԱԵԿ-ի (PERC)  նախագահի և  գլխավոր քարտուղարի կողմից կատարած համատեղ հայտարարությունը: Ավելին, մենք դիմել ենք ԵԱՀԿ նախագահին և Մինսկի խմբի համանախագահներին՝ լիարժեք իրացնելու իրենց մանդատը և շարունակելու առաջ տանել բոլոր կողմերի ներգրավվածությունը և հորդորել նրանց վերստին հավատարիմ մնալ կարգավորման գործընթացին՝ հիմք ընդունելով միջազգային իրավունքի առկա հիմնական նորմերն ու սկզբունքները և համապատասխան միջազգային փաստաթղթերը, մասնավորապես՝  ՄԱԿ-ի Անվտանգության խորհրդի և Գլխավոր ասամբլեայի բանաձևը: Մենք նաև կապեր ենք հաստատում Ալբանիայի և Շվեդիայի մեր մասնաճյուղերի հետ (ԵԱՀԿ նախագահի և ապագա նախագահի հետ), ինչպես նաև Ռուսաստանի, Ֆրանսիայի և ԱՄՆ-ի հետ՝ սույն ուղերձն իրենց երկրների կառավարություններին փոխանցելու համար:

 Անհրաժեշտ է դադարեցնել արյունահեղությունը: Մենք կոչ ենք անում բոլոր անդամներին միավորվել և բարձրաձայնել «Եվրոպան առանց հակամարտության և առանց պատերազմի» կարգախոսը: Մենք արդարության և երկխոսության կոչ ենք անում և պատրաստ ենք համերաշխ աջակցություն ցուցաբերել Հայաստանի արհմիություններին և քննարկել աշխատողների ընդհանուր շահերի խթանումը, այն է՝ արժանապատիվ աշխատանքը, նրանց ընտանիքների առողջության և բարեկեցության ապահովման հետագա քայլերը և, անշուշտ, խաղաղությունը:

 

Հարգանքով,

 

Շարան Բուրրոու                                                     Լուկա Վիզենտինի

Գլխավոր քարտուղար                                        Գլխավոր քարտուղար

Արհ. ՄԿ                                                                       ԱԵԿ և Արհ.ՄԿ

06 Հոկտեմբեր, 2020

02 Հոկտեմբեր, 2020

ՀԱՅԱՍՏԱՆԻ ԱՐՀՄԻՈՒԹՅՈՒՆՆԵՐԻ ԿՈՆՖԵԴԵՐԱՑԻԱՅԻ

ՇՆՈՐՀԱՎՈՐԱՆՔԸ

ՈՒՍՈՒՑՉԻ ՕՐՎԱ ԿԱՊԱԿՑՈՒԹՅԱՄԲ

 

 Հայաստանի արհմիությունների կոնֆեդերացիան շնորհավորում է Կրթության և գիտության աշխատողների արհեստակցական կազմակերպությունների ճյուղային հանրապետական միությանը, արհմիության անդամներին, բոլոր ուսուցիչներին մասնագիտական տոնի՝ Ուսուցչի օրվա կապակցությամբ:

 Հարգելի մանկավարժներ, ուսումնական տարվա ընթացքում կորոնավիրուսի համաճարակով պայմանավորված անսպասելի մրտահրավերները նոր խնդիրներ ստեղծեցին կրթության ոլորտում: Եվ միայն ձեր նվիրված աշխատանքի շնորհիվ հնարավոր եղավ ապահովել ուսումնական գործընթացի շարունակականությունը, թեկուզ հեռավար, բայց պարտաճանաչ անցկացնել դասերը:

 Հարգելի ուսուցիչներ, երախտապարտ ենք ձեզ այն կարևոր ու դժվարին աշխատանքի համար, որ իրականացնում եք՝ կրթելով ու դաստիարակելով մեր երեխաներին, սերմանելով նրանց մեջ սեր և հարգանք գիտելիքի հանդեպ: Դրանով դուք կերտում եք մեր երկրի ու ժողովրդի ապագան, ինչը հայրենանվեր ու ազգանպաստ գործ է:

 Մեկ անգամ ևս շնորհավորելով մասնագիտական տոնի կապակցությամբ, մաղթում եմ բոլորիդ առողջություն, հաջողություն ուսուցումն անխոչընդոտ և բարձր մակարդակով իրականացնելու համար:

 

 

Հայաստանի արհմիությունների

Կոնֆեդերացիայի նախագահ                                   ԷԴՈՒԱՐԴ ԹՈՒՄԱՍՅԱՆ